ربیع الاولنعت رسول

نعت رسول: پھیلی ہوئی ضیا ہے، لَقَدْ جَاءَکُمْ رَسُوْل

نتیجۂ فکر: طفیل احمد مصباحی

پھیلی ہوئی ضیا ہے، لَقَدْ جَاءَکُمْ رَسُوْل
مہکی ہوئی فضا ہے، لَقَدْ جَاءَکُمْ رَسُوْل

ماحول خوشنما ہے ، لَقَدْ جَاءَکُمْ رَسُوْل
کونین مشک زا ہے ، لَقَدْ جَاءَکُمْ رَسُوْل

ہر سمت نور و نکہت و وجد و سرور کا
پُر کیف سلسلہ ہے ، لَقَدْ جَاءَکُمْ رَسُوْل

میلادِ مصطفیٰ کی سہانی گھڑی ہے یہ
ہر لب پہ مرحبا ہے ، لَقَدْ جَاءَکُمْ رَسُوْل

لرزہ ہے طاری قیصر و کسریٰ کے قصر میں
یہ کون آ گیا ہے ، لَقَدْ جَاءَکُمْ رَسُوْل

دنیائے کفر و شرک و ضلالت میں دیکھیے
ماتم عجب بپا ہے ، لَقَدْ جَاءَکُمْ رَسُوْل

” قَدْ مَنَّ ” سے عیاں یہ ہوا بعثتِ نبی
انعامِ کبریا ہے ، لَقَدْ جَاءَکُمْ رَسُوْل

گلزارِ ہست و بود میں کس آب و تاب سے
رحمت کا گُل کھِلا ہے ، لَقَدْ جَاءَکُمْ رَسُوْل

ظلم و جفا و جبر فنا ہو گئے سبھی
اب عدل کو بقا ہے ، لَقَدْ جَاءَکُمْ رَسُوْل

دیکھو لبِ نبی کو ” تشہُّدْ ” کے ما سوا
ہر گز نہ ” حرفِ لا ” ہے ، لَقَدْ جَاءَکُمْ رَسُوْل

اے منکرینِ عظمتِ سرکار ! دیکھ لو
قرآن کی صدا ہے ، لَقَدْ جَاءَکُمْ رَسُوْل

احمد پڑھو درود ، کرو گھر میں روشنی
قَدْ جَاءَکُمْ رَسُوْل ، لَقَدْ جَاءَکُمْ رَسُوْل

ہماری آواز

ہماری آواز ایک غیر جانب دار نیوز ویب سائٹ ہے جس پر آپ سچی خبروں کے ساتھ ساتھ مذہبی، ملی،قومی، سیاسی، سماجی، ادبی، فکری و اصلاحی مضامین اور شعر وشاعری پڑھ سکتے ہیں۔ یہی نہیں آپ خود بھی ہمیں اپنے پاس پڑوس کی خبریں اور مضامین وغیرہ بھیج سکتے ہیں۔

متعلقہ مضامین و خبریں

جواب دیں

Back to top button