نتیجہ فکر : محمد اشرفؔ رضا قدری
مدیر اعلی سہ ماہی امین شریعت
بوستانِ علم و حکمت خواجہ قطب الدین ہیں
گلْسِتانِ خیر و برکت خواجہ قطب الدین ہیں
دانا و بینا، حقیقت آشنا، روشن ضمیر
صاحبِ فکر و بصیرت خواجہ قطب الدین ہیں
پرچمِ اسلام لہرایا زمینِ کفر پر
قاطعِ کفر و ضلالت خواجہ قطب الدین ہیں
پڑھ کے لگتا ہے یہی ان کی "فوائد سالکیں”
جامعِ شرع و طریقت خواجہ قطب الدین ہیں
ان کو بخشی ہے خلافت خواجۂ اجمیر نے
خواجہ کی زندہ کرامت خواجہ قطب الدین ہیں
بادۂ توحید و الفت پی کے ہیں وہ شاد کام
نازشِ بزمِ طریقت خواجہ قطب الدین ہیں
اپنے مرشد کی نیایت کا ادا حق کر دیا
پاسبانِ قوم و ملت خواجہ قطب الدین ہیں
دین کی تبلیغ فرمائی نہایت شان سے
دینِ احمد کی ضرورت خواجہ قطب الدین ہیں
اپنے منگتوں کو وہ خالی ہاتھ لوٹاتے نہیں
مخزنِ فیض و کرامت خواجہ قطب الدین ہیں
بس اسی فقرے پہ اشرف روک دو اپنا قلم
حامیِ دین و شریعت خواجہ قطب الدین ہیں
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
آسان ہندی زبان میں اسلامی، اصلاحی، ادبی، فکری اور حالات حاضرہ پر بہترین مضامین سے مزین سہ ماہی میگزین نور حق گھر بیٹھے منگوا کر پڑھیں!
