اسلامی تاریخ میں ہر صدی میں ایسے مجددین پیدا ہوئے جنہوں نے دینِ مصطفوی ﷺ کی اصل صورت کو بحال کیا، بدعات و خرافات کا رد کیا، اور امت کو قرآن و سنت کی روشن شاہراہ پر گامزن کیا۔ برصغیر میں 14ویں صدی ہجری کے سب سے بڑے مجدد، محدث، فقیہ، مفسر اور عاشقِ رسول ﷺ کی حیثیت سے امام احمد رضا خان فاضل بریلوی علیہ الرحمہ کا نام سنہری حروف میں رقم ہے۔ آپ نے اپنے دور میں دین کے ہر شعبے میں ایسی تجدیدی خدمات انجام دیں جو آج بھی دین اسلام، مذہب اہلِ سنت کا سرمایۂ افتخار ہیں۔
1. تحفظِ عقیدۂ ختمِ نبوت
اعلیٰ حضرت سیدی امام احمد رضا محدث بریلوی رضی اللہ عنہ نے مرزائی فتنے (قادیانیت) کے خلاف سب سے مؤثر علمی و شرعی رد پیش کیا۔ آپ نے واضح فرمایا کہ ختمِ نبوت عقیدۂ اسلام کی بنیاد ہے اور اس کے منکر دائرۂ اسلام سے خارج ہیں۔ یہ فتویٰ برصغیر کے ہر کونے تک پہنچا اور آج بھی عقیدۂ ختمِ نبوت کی اساس میں آپ کا کردار ناقابلِ فراموش ہے۔
2. ردِّ گستاخیٔ رسول ﷺ
آپ کے دور میں گستاخانِ آقائے کائنات حضور ﷺ نے مسلمانوں کے ایمان پر حملہ کیا۔ اعلیٰ حضرت امام احمد رضا نے اپنی قلم و زبان سے ان کا علمی و شرعی محاصرہ کیا، اور “فتاویٰ رضویہ” میں واضح کیا کہ حضور ﷺ کی توہین کفر ہے اور اس کے مرتکب سے براءت لازم ہے۔ اس تجدیدی اقدام نے عشقِ رسول ﷺ کو مسلمانوں کے دلوں میں مزید راسخ کر دیا۔
3. بدعاتِ سیّئہ کا خاتمہ اور سنتوں کی ترویج
اعلیٰ حضرت محد ث بریلوی نے عوام میں پھیلی ایسی رسومات کا رد کیا جو شریعت کے خلاف تھیں، جیسے ہندووانہ رسومات، غیر شرعی میلوں اور خرافات۔ اس کے ساتھ ساتھ آپ نے سنتوں کی ترویج کے لیے عوامی سطح پر تحریک پیدا کی، اصلاحی معاشرہ کا ماحول تحریرا تقریرا تدبیرا پیدا کیا۔ جس کا نتیجہ یہ نکلا کہ گھروں اور مساجد میں سنتوں پر عمل کا ماحول پیدا ہوا۔ شریعت و سنت کی بہاریں نظر آنے لگیں ۔
4. فقہِ حنفی کا احیاء اور تحفظ
اعلیٰ حضرت امام احمد رضا محدث بریلوی نے فقہِ حنفی کو 14ویں صدی میں ایک نئے انداز میں زندہ کیا۔ “فتاویٰ رضویہ” میں آپ نے جدید اور قدیم مسائل کو حنفی اصول کے مطابق حل کیا۔
ریلوے، ڈاک، ٹیلیگراف جیسے نئے مسائل
سودی لین دین کے جدید طریقے
غیر مسلم حکومت کے تحت مسلمانوں کے مسائل
ان سب پر آپ نے مدلل فتاویٰ تحریر کیے۔ وغیرہ
5. تصوف کی تجدید
اعلیٰ حضرت امام احمد رضا محدث بریلوی نے تصوف کے نام غیر شرعی اموراور بدعات کو بے اعتدالیوں سے پاک کر کے اسے قرآن و سنت کے تابع کیا۔ آپ نے واضح فرمایا کہ تصوف کا حقیقی مقصد تزکیۂ نفس اور اتباعِ شریعت ہے، اور ہر وہ تصوف جو شریعت سے آزاد ہو، وہ گمراہی ہے۔
6. نعتیہ ادب میں تجدید
اعلیٰ حضرت امام احمد رضا نے نعتیہ شاعری کو صرف مدحِ رسول ﷺ تک محدود نہ رکھا بلکہ اسے ایک اصلاحی اور ایمانی قوت بنایا۔ “حدائقِ بخشش” میں آپ کی نعتیں عشقِ رسول ﷺ کا دریا اور عقائدِ اہلِ سنت کی حفاظت کا قلعہ ہیں۔
7. جدید سائنسی و فکری مسائل پر اجتہادی رہنمائی
آپ نے ریاضی، فلکیات، اور سائنس کے بعض مسائل پر اسلامی نقطۂ نظر پیش کیا۔ آپ کی کتاب “الفوز المبین” اور دیگر رسائل میں سائنسی و شرعی مطابقت پر بحث ملتی ہے، جو اس بات کا ثبوت ہے کہ آپ کا تجدیدی دائرہ صرف فقہ و عقیدہ تک محدود نہیں تھا بلکہ علم کے ہر شعبے کو محیط تھا۔ آپ ہر میدان علم و عمل کے بادشاہ آیت من آیات اللہ معجزہ من معجزات رسول اللہ تھے ۔ آپ کی ذات اقدس سے دین وسنیت کا بہت فروغ ہوا ، آپ نے ہر چہار عالم میں احقاق حق ابطال باطل کی پہچان کرائی ۔ دین سے دور افراد کو دینکے قریب کیا ، سوئی قوم کو ہرمحاذ پہ جگایا ، خانقاہ و درسگاہ حقیقی رنگ دکھائی ۔اس کے نتیجہ ہرسمت سے صدا آنے لگی ۔
وادی رضا کی کوہ ہمالہ رضا کا ہے
جس سمت دیکھئے وہ علاقہ رضا کا ہے
اعلیٰ حضرت امام احمد رضا خان علیہ الرحمہ کے تجدیدی کارنامے صرف برصغیر تک محدود نہیں بلکہ پوری امتِ مسلمہ کے لیے مشعلِ راہ ہیں۔ آپ نے دین کے ہر شعبے میں ایسی تجدید کی جو قرآن و سنت کے مطابق اور اہلِ سنت کے عقائد و اعمال کی حفاظت کا ذریعہ بنی۔ آپ کی یہ خدمات اس بات کا ثبوت ہیں کہ آپ نہ صرف 14ویں صدی کے مجدد تھے بلکہ قیامت تک آنے والے علماء کے لیے ایک معیار اور رہنما ہیں۔
ازقلم; (خلیفہ حضور تاج الشریعہ مفتی) شاکرالقادری فیضی
بانی دارالعلوم فیضان تاج الشریعہ اودے پور راجستھان
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
آسان ہندی زبان میں اسلامی، اصلاحی، ادبی، فکری اور حالات حاضرہ پر بہترین مضامین سے مزین سہ ماہی میگزین نور حق گھر بیٹھے منگوا کر پڑھیں!
