نتیجہ فکر : محمد اشرفؔ رضا قادری
بلودا بازار چھتیس گڑھ
علم و ادب کی جان ہوں ، اردو زبان ہوں
تہذیب کا نشان ہوں ، اردو زبان ہوں
کہتے ہیں جس کو ‘ میر تقی میر ‘ اہلِ فن
میں ان کی شان بان ہوں ، اردو زبان ہوں
غالب نے میرے باغ کو سینچا ہے خون سے
سودا کی آن بان ہوں ، اردو زبان ہوں
پوشیدہ مجھ میں سحر بیانی ہے دوستو
میں ساحر البیان ہوں ، اردو زبان ہوں
‘ گنگا ‘ کے جل سے گوندھی گئی ہے مری خمیر
‘ جمنا ‘ سی مہربان ہوں ، اردو زبان ہوں
مہر و وفا ، خلوص و محبت کی اینٹ سے
تیار ، اک مکان ہوں ، اردو زبان ہوں
آزادیِ وطن کے لیے خوب ہوں لڑی
اس واسطے مہان ہوں ، اردو زبان ہوں
انگریزوں کو بھگایا ہے ہندوستان سے
میں تیر ہوں ، کمان ہوں اردو زبان ہوں
پاتے ہیں اہلِ ہند سکوں میری چھاؤں میں
شفقت کا سائبان ہوں ، اردو زبان ہوں
تیغِ جفا سے میرا بدن ہے لہولہان
میں آج بے امان ہوں ، اردو زبان ہوں
اشرف ! ہوں خاکساری میں بالکل زمیں کے مثل
رفعت میں آسمان ہوں ، اردو زبان ہوں
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
آسان ہندی زبان میں اسلامی، اصلاحی، ادبی، فکری اور حالات حاضرہ پر بہترین مضامین سے مزین سہ ماہی میگزین نور حق گھر بیٹھے منگوا کر پڑھیں!
