خیال آرائی: گل گلشن، ممبئی
ہے بڑا تو وہی عاجزی سے رہے
سارے شکوے بھلا کر خوشی سے رہے
موت جب آئے گی تنہا لے جاۓ گی
ہم یہی سوچ کر سادگی سے رہے
جب تلک ان کو ہم سے یوں مطلب رہا
تب تلک مہرباں چاشنی سے رہے
تیرے ہر ایک ستم کو گنوارا کیا
ہم نے کچھ نہ کہا خامشی سے رہے
ایک رشتہ تمہارا ہی مضبوط تھا
ورنہ رشتے سبھی کاغذی سے رہے
اب کے اہل سیاست کا فرمان ہے
صحن مقتل میں گل تازگی سے رہے
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
آسان ہندی زبان میں اسلامی، اصلاحی، ادبی، فکری اور حالات حاضرہ پر بہترین مضامین سے مزین سہ ماہی میگزین نور حق گھر بیٹھے منگوا کر پڑھیں!
