تضمین نگار: محمد اشرف رضا قادری
مدیر اعلیٰ سہ ماہی امین شریعت
اے عرب کے چاند اے مہرِ مبیں
تجھ سا دنیا میں کہاں کوئی حسیں
تیرے آگے خم عقیدت کی جبیں
السلام اے خسرو دنیا و دیں
السلام اے راحتِ جانِ حزیں
تیرے دم سے مہ کی ہے تاب و تواں
مہر تیرے نور سے ہے ضوفشاں
ذات تیری فضلِ رب کی ہے نشاں
السلام اے بادشاہِ دو جہاں
السلام اے سرورِ کون و مکاں
ہے نبوت ہو گئی تجھ پر تمام
سب سے ستھرا ہے تِرے در کا نظام
بولتے ہیں یہ ملائک صبح و شام
السلام اے نورِ ایماں السلام
السلام اے راحتِ جاں السلام
بے کس و مفلس کے آقا السلام
زینتِ عرشِ معلیٰ السلام
اے شبِ اسریٰ کے دولھا السلام
درد و غم کے چارہ فرما السلام
درد مندوں کے مسیحا السلام
دور کر دے رنج و اندوہ و ملال
دے کے خوشیاں کردے پھر چہرہ بحال
میں بتاؤں کس سے جاکر حال چال
نبضیں ساقط ،روح مضطر ،جی نڈھال
دردِ عصیاں سے ہوا ہے غیر حال
جلوۂ زیبا ہمیں دکھلایئے
ابرِ فیضانِ کرم برسایئے
ہم غلاموں کے یہاں بھی آیئے
ہم غریبوں پر کرم فرمائیے
بد نصیبوں پر کرم فرمائیے
جلوۂ زیبا دکھانے آئیے
آگ اس دل کی بجھانے آئیے
قیدِ عصیاں سے چُھڑانے آئیے
بے قراروں کے سرھانے آئیے
دل فگاروں کے سرھانے آئیے
بڑھ چکا ہے آج طوفانوں کا شر
کس کو بتلاؤں میں احوالِ جگر
اے رسولِ مجتبیٰ، خیر البشر
راہ نامعلوم صحرا پُر خطر
کوئی ساتھی ہے نہ کوئی راہبر
ہے مِرے پیش نظر حالِ تباہ
تنگ ہے عقل و خرد کی شاہ راہ
اے جہاں کے تاج والے بادشاہ
ہر طرف کرتا ہوں حیرت کی نگاہ
پر نہیں ملتی کسی صورت سے راہ
سرورِ دنیا و دیں، شاہِ امم
ہے ہجوم غم سے میری آنکھ نم
مجھ پہ اب لِلّٰہ فرما دو کرم
اے عرب کے چاند اے مہرِ عجم
اے خدا کے نور اے شمعِ حرم
یا نبی چشمِ عنایت کیجیے
دور ہر رنج و مصیبت کیجیے
میری بھی عرضی سماعت کیجیے
ہم سیہ کاروں پہ رحمت کیجیے
تیرہ بختوں کی شفاعت کیجیے
شادماں اب قلبِ مضطر کیجیے
در کا اشرفؔ کو گداگر کیجیے
اس کے حق میں جو ہو بہتر کیجیے
کیجیے رحمت حسنؔ پر کیجیے
دونوں عالم کی مرادیں دیجیے
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
