نتیجۂ فکر: عبدالمبین حاتمؔ فیضی، مہراج گنج
صمیمِ قلب سے جو ہوگیا سرکار کا عاشق
ہوا وہ رب کا ! اور اس کا زمانہ ہوگیا عاشق
ترے دل کے صدَف میں گوہرِ عشقِ پیمبر ہے
مُبارک صَد مبارک مرحَبا صد مرحَبا ! عاشق
رخِ جاناں کی رؤیت کا اُسے بھی مِل گیا موقع
بوقتِ موت اسی کو سوچ کر شاداں دِکھا عاشق
سِکندر اور بھی ہیں کرَّۂِ گیتی پہ سچ ! لیکن
"مقدر کا سکندر ہے مرے سرکار کا عاشق”
حَیاتِ جاوِدانی مِل گئی اس کو ! بحمد اللہ
فَنا جب عشقِ سرکارِ مدینہ میں ہوا عاشق
نہ جانے کِتنے عاشق ہیں شہنشاہِ مدینہ کے
مگر مِلتا نہیں صِدِّیق جیسا دوسرا عاشق
مری قسمت پہ خودقسمت کواس دم رشک آئےگا
قیامت میں اگر کہہ دیں وہ ! حاتم ہے مرا عاشق
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
آسان ہندی زبان میں اسلامی، اصلاحی، ادبی، فکری اور حالات حاضرہ پر بہترین مضامین سے مزین سہ ماہی میگزین نور حق گھر بیٹھے منگوا کر پڑھیں!
