نتیجہ فکر: غلام محی الدین جیلانی عرشی
اے رحمت ، کونین گھٹا غم کی ہے چھائی ، للہ دہائی
اے صاحبِ قوسین مدد کی گھڑی آئی ، للہ دہائی
حاصل ہے تُجھے تحفۂِ معراج کی دولت اللّٰہ کی رحمت
اے نور خُدا لاڈلۂِ آمنہ دائی ، للّٰہ دہائی
اے سرور کونین شہنشاہ مدینہ ، انمول نگینہ
حاصل ہے تُجھے بارگہِ رب میں رسائی ، للّٰہ دہائی
ممدوحِ رضاحضرت حسان وسعدی بوصیری وجامی
اللہ تعالیٰ بھی کرے تیری بڑائی ، للّٰہ دہائی
حاصِل ہے تُجھے جملہ رسولوں کی امامت ، یہ شان وکرامت
اے مظہرِ حق ، شاہِ جہاں ، ظل خدائی ، للّٰہ دہائی
شاہان زمانہ مرے آگے نہ چلیں گے پیچھے ہی رہیں گے
مل جائے اگر مجھ کو ترے در کی گدائی ، للّٰہ دہائی
اِس ڈوبتی کشتی کو ملے تیرا سہارا ، مل جائے کنارا
"عرشی” نے بھی اُمّید ترے در سے لگائی ، للّٰہ دہائی
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
آسان ہندی زبان میں اسلامی، اصلاحی، ادبی، فکری اور حالات حاضرہ پر بہترین مضامین سے مزین سہ ماہی میگزین نور حق گھر بیٹھے منگوا کر پڑھیں!
