افکار کی کرتے ہیں تزئین شہِ سمناں
ہیں ہر دل عاشق کی تسکین شہِ سمناں
عشاق کے چہروں پر کیونکر نہ خوشی چھائے
ہونے ہی نہیں دیتے غمگین شہِ سمناں
کچھ بھی ہو در شہ سے رشتہ نہ کبھی ٹوٹے
ہردم یہی کرتے تھے تلقین شہِ سمناں
ہے مجھ کو یقیں ہوگی مقبول دعا میری
اک بار اگر کہہ دیں آمین شہِ سمناں
چشمان عنایت کی اب سخت ضرورت ہے
حالات ہیں بھارت کے سنگین شہِ سمناں
اس کے ہی اجالوں میں طے اپنا سفر کرنا
بخشے جو تصوف کو آئین شہِ سمناں
سرکار دوعالم کی سنت کا جو عامل ہے
بس اس کی ہی کرتے ہیں تحسین شہِ سمناں
اک نعت کچھوچہ میں پڑھ آنا کبھی اشرف ؔ
ہیں نعت رسالت کے شوقین شہِ سمناں
ازقلم
خادمِ امین شریعت
محمد اشرف رضا قادری
