علما و مشائخ منقبت

غمِ رحلتِ شرر

جماعتِ اہل سنت کے عظیم ادیب و نقّاد و شاعرحضرت علامہ ڈاکٹر فضل الرحمٰن شرر مصباحی کی رحلت پر اشک تعزیت،
وصال، شبِ یکشنبہ29 رمضان المبارک 1443ھج
یکم مئی 2022ع


راہِ سخن پہ کر گیے ایسا سفر شرر
چمکے ادب کے چرخ پہ مثلِ قمر شرر

انتسویں شبِ مہِ رمضاں کو پا گیے
عفو و کرم کا دائمی نورِ سحر شرر

یکتاے فن ،محقق و نقّاد شخصیت
اہلِ قلم کی آبرو اور کرّوفر شرر

رخصت ہوا عروض کی دنیا کا بادشاہ
بزم سخن پکار رہی ہے شرر شرر

عقدۂ کُشاے سِرِّ زبان و بیان و فن
مدحت سراے عظمتِ خیرالبشر شرر

نکلی لبِ جہانِ ادب سے صداے آہ
جسدم ترے وصال کی آئ خبر شرر

یاد آرہی ہے تیری اے مہتاب سُنیت
اشکِ الم سے چشمِ محبت ہے تر شرر

اہل زباں کے واسطے اک منزل عروج
تیری نگارشات و سخن کی ڈگر شرر

تیرا ہر اک صحیفۂ تحریر ، بے نظیر
یکتا ترے کمالوں کا ہر اک گہر شرر

تو اٹھ گیا ، سمٹ گئ تیری بساطِ فن
آتا نہیں ہے دوسرا تجھ سا نظر شرر

مصباحیت کی شان، تری علمی آن بان
اے باغِ اشرفیّہ کے خوشتر ثمر شرر

اے جلوۂ عزیزی کے مینارِ شاہکار
مَدَّھم نہ ہونگے تیرے چراغِ ہنر شرر

تسکین قلبِ حافظ ملت ہے تیری ذات
فرمایا تجھ کو شاہ نے اپنا پسر شرر

اے آبروے خانۂ ملت ، تجھے سلام
باغِ جناں بنے تری عقبیٰ کا گھر شرر

آئینۂ حیات ، کثیر الصِّفات ہے
کیا کیا لکھے فریدی تری ذات پر شرر
=====
از: سلمان رضا فریدی صدیقی مصباحی ،نوری مسجد مدینۃ العرفان ، مسقط عمان

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے