تاریخ عید میلادالنبی صلی اللہ علیہ وسلم کی منظوم جھلکیاں

پیدائش مولا کی دھوم

ازقلم: کیف الحسن قادری
خادم: تنویر القران انسٹی ٹیوٹ دہلی این سی آر

=========================================

عرب کی خاک پر مہر رسالت کی کرن چمکی
جہان فکر چمکا، آگہی کی انجمن چمکی

منور ہو گیا سارا زمانہ نور وحدت سے
ہمیشہ کو بدل کر رہ گئی نفرت، محبت سے

متاعِ دین و ایماں مل گئی تو مل گئی ہر شئے
کہ اس دولت کے آگے ہیچ دنیا بھر کی دولت ہے

یہ دولت پاکے ہر ایمان والا ناز کرتا ہے
عروجِ زندگی کا حسن نظروں میں اترتا ہے

مچلتا ہے نبی کے عشق میں ہر ایک دیوانہ
لٹاتا ہے دل و جاں کا بصد انداز نذرانہ
۔۔۔۔۔۔۔۔۔۔۔۔۔۔۔۔

مناؤ "عید میلاد النبی” کا جشن سب مل کر
ربیع النور کا پر کیف منظر ہے ضیا گستر

ہزاروں عیدیں ہیں شان ربیع النور پر قرباں
سوا شیطاں کے، سارے دہر میں ہے ہر کوئی شاداں

"مواہب” کے مصنف نے محقق طور پر لکھا
ہے افضل، قدر کی شب سے شب پیدائش آقا

(المواہب اللدنیۃ ج: ۔۔ص: ۔۔۔۔)
۔۔۔۔۔۔۔۔۔۔۔۔۔۔۔

مچے گی دم بدم پیدائش مولا کی دھوم ایسی
رہے گا سر نگوں ہر قصر نجدی مثل فارس ہی
۔۔۔۔۔۔۔۔۔۔۔۔۔۔

وہ أئے، رب کی جو سب سے عظیم الشان نعمت ہیں
وہ آئے، درحقیقت سارے عالم کی جو رحمت ہیں

(القرآن پ 17 الانبیاء: 107)
۔۔۔۔۔۔۔۔۔۔۔۔۔۔

وہ آئے، جو ہیں ساری نسل انسانی کے پیغمبر
وہ آئے، ختم ہے پیغمبری کا سلسلہ جن پر

(القرآن پ 18 الاحزاب: 39.صحیح البخاری/ مشکوۃ المصابیح)
۔۔۔۔۔۔۔۔۔۔۔۔۔۔

وہ أئے درحقیقت جو حبیب ذو المنن ٹھہرے
خدائے پاک خود ہر بات میں جس کی رضا چاہے

(القرآن پ 2 البقرۃ: 144)
۔۔۔۔۔۔۔۔۔۔۔۔۔۔۔۔

کیا محبوب اور بخشا جمال بے نظیر ان کو
خدا نے خود ہی فرمایا عطا خیر کثیر ان کو

(القرآن پ 30 الکوثر: 1)
۔۔۔۔۔۔۔۔۔۔۔۔۔۔۔

بنا جن کے لیے یہ آسماں سارا، زمیں ساری
وہ آئے،جن کی طاعت ہے یقیناً طاعت باری

(القرآن پ 5 النساء: 80)
۔۔۔۔۔۔۔۔۔۔۔۔۔۔۔

سجایا گلشن فردوس جس محبوب کی خاطر
جنہیں اللہ نے بھیجا بنا کر حاضر و ناظر

(القرآن پ 18 الاحزاب: 49)
۔۔۔۔۔۔۔۔۔۔۔۔۔۔۔۔

گزاری مالک کونین ہو کر زندگی سادہ
جو ہیں نزدیک، ایماں والوں کی جانوں سے بھی زیادہ

(القرآن پ 18 الاحزاب: 6 صحیح البخاری ج: 2 ص: 323)
۔۔۔۔۔۔۔۔۔۔۔۔۔۔۔

وہ آئے، جن کو سب سے بڑھ کے خوئے حق پسندی دی
وہ آئے، رب تعالیٰ نے جنہیں درجنوں بلندی دی

(القرآن پ 3 البقرۃ: 253)
۔۔۔۔۔۔۔۔۔۔۔۔۔۔

جو ذرے ذرے کو رشک مہ و اختر بناتے ہیں
وہ آئے، جو علوم غیب کے دریا بہاتے ہیں

(القرآن پ 30 التکویر: 24)
۔۔۔۔۔۔۔۔۔۔۔۔۔

وہ آئے نور بن کر جس نے قسمت سب کی چمکائی
کہ اس نور خدا کے ساتھ اک روشن کتاب آئی

(القرآن پ 6 المائدہ: 15)
۔۔۔۔۔۔۔۔۔۔۔۔۔۔۔

وہ آئے، جن کے نقش پا کو جو کوئی بھی اپنا لے
تو اس بندے سے فوراً دوستی اللہ فرمالے

(القرآن پ 3 آل عمران:31)
۔۔۔۔۔۔۔۔۔۔۔۔۔۔

وہ آئے عالم انسانیت کے جو معلم ہیں
وہ آئے جو عطائے حق سے ہر نعمت کے قاسم ہیں

(شکاۃ المصابیح ص: 32)
۔۔۔۔۔۔۔۔۔۔۔۔۔۔

وہ آئے جن کی الفت باعث تکمیل ایماں ہے
بقول اعلیٰ حضرت جن کی ذات ایمان کی جاں ہے

(حدائق بخشش حصہ اول ص: 105)
۔۔۔۔۔۔۔۔۔۔۔۔۔۔۔۔

وہ آئے ہر مرض ہر دکھ کی ہر غم کی دوا بن کر
غریبوں بے نواؤں کے لیے حاجت روا بن کر

(مرقاۃ المفاتیح جلد 11 ص: 89)
۔۔۔۔۔۔۔۔۔۔۔۔۔۔۔۔۔۔

وہ آئے جن کا دست ناز تھا ریشم سے نازک تر
پسینہ جن کا خوشبودار تھا ہر عطر سے بڑھ کر

(مرقاۃ المفاتیح جلد 11)
۔۔۔۔۔۔۔۔۔۔۔۔۔۔۔۔۔

محمد مصطفیٰ کا نور رب کی خلق اول ہے
نظام دو جہاں جس کی تجلی سے مکمل ہے

خدا نے پیشتر نام محمد عرش پر لکھا
فرشتوں میں رہا چاروں طرف اس نام کا چرچا

بخوبی جانتے تھے فلسفہ لاریب سب قدسی
محمد اول و آخر بھی ہیں ظاہر بھی باطن بھی
۔۔۔۔۔۔۔۔۔۔۔۔۔۔۔

سجی تھی عالم ارواح میں میثاق کی محفل
حقیقت میں تھی ہر رخ سے یہ محفل دید کے قابل

کہ اس محفل میں جملہ انبیاء کی روحیں حاضر تھیں
صدائیں خالق کونین کی اس درمیاں گونجیں

کیا رب نے بیاں شاہ دنی کی آمد آمد کا
کیا کس شان سے اللہ نے محبوب کا چرچا

وقار مصطفیٰ اس اوّلیں محفل سے ہے ظاہر
تھے سننے والے جس میں انبیاء، اللہ تھا ذاکر

حقیقت کا اجالا آج بھی نظروں میں وارد ہے
بنام "آل عمراں” سورہ قرآن شاہد ہے

(القرآن پ 3 آل عمران: 81
۔۔۔۔۔۔۔۔۔۔۔۔۔۔۔

ہوئی پھر بعثت پیغمبراں جب جب بھی دنیا میں
رہے رطب اللساں سب زندگی بھر یاد آقا میں
۔۔۔۔۔۔۔۔۔۔۔۔۔۔

خدا نے قالب آدم میث اپنی روح جب ڈالی
تو ساق عرش پر دیکھا انہوں نے آنکھ کھلتے ہی

جہاں نام الہی ہے وہیں نام محمد ہے
وہ بولے: مجھ کو حیرانی تو اس منظر پہ ازحد ہے

خدایا نام کس کا ہے یہ تیرے نام کے شامل
ہوا ارشاد رب العالمیں ان کی طرف نازل

کہ وہ اولاد میں تیری ہے سب سے بعد پیغمبر
نہ ہوتا وہ تو میں پیدا نہیں کرتا تجھے یکسر

ملا اس کے ہی صدقے زندگی کا تجھ کو یہ تمغہ
ہے چرخ وارض کی خلقت اسی محبوب کاصدقہ
۔۔۔۔۔۔۔۔۔۔۔۔۔۔

بڑا آدم کو نام مصطفیٰ سے سابقہ پہلا
فرشتوں سے بھی سننے کو ملا چرچا محمد کا

لہذا اس سبق کو یاد انہوں نے عمر بھر رکھا
خیال مصطفیٰ سے ربط کامل عمر بھر رکھا

(حیات اعلیٰ حضرت حصہ 1 ص: 194)
۔۔۔۔۔۔۔۔۔۔۔۔۔۔۔

یوں ہی ہوتا رہا ذکر محمد ہر زمانے میں
بہت کم فاصلہ اب رہ گیا تشریف لانے میں

دیا عیسیٰ نے مژدہ، فیصلہ رب کا نرالا ہے
ہے جس کا نام احمد وہ پیمبر آنے والا ہے

(القرآن پ ۔۔۔ الصف: 6)
۔۔۔۔۔۔۔۔۔۔۔۔۔

ہوا جب منتقل نورمحمد بطن مادر میں
قریش مکہ کے سب جانور بول اٹھے تیور میں

کہ بطن آمنہ میں ہو چکے ہیں منتقل آقا
قسم اس رب کعبہ کی جو سارے جگ کا ہے داتا

(حجۃ اللہ علی العالمین آمین ص: ۔۔۔۔)
۔۔۔۔۔۔۔۔۔۔۔۔۔۔۔۔

اثر جس واقعہ نے چار سو دنیا میں دکھلایا
وہ "عام الفیل” کے پنجاہ دن کے بعد پیش آیا

ربیع النور کی تھی بارہویں تاریخ ضو افشاں
کہ اس تاریخ نے سارے جہاں کو کردیا تاباں

(الانوار المحمدیہ ص: 27)
۔۔۔۔۔۔۔۔۔۔۔۔۔۔۔۔

بوقت فجر دوشبہ، وہ دل افروز ساعت تھی
جناب آمنہ کے گھر شہ دیں کی ولادت تھی

(حجۃ اللہ علی العالمین ص: 227)
۔۔۔۔۔۔۔۔۔۔۔۔۔۔

ازل سے لطف سبحانی تھا جس کی ذات پر شیدا
بیان آمنہ ہے جب وہ شہزادہ ہوا پیدا

تم نکلا وہ سراپا نور اس کی شکل میں مجھ سے
قصور شام جس کی روشنی میں جگمگا اٹھے

وہ پیدائش کے موقع سے تھا شفاف و نظیف ایسا
نہ جس کے ساتھ آلائش کا قدرے شائبہ تک تھا

(حجۃ اللہ علی العالمین ص: 227)
۔۔۔۔۔۔۔۔۔۔۔۔۔۔۔

لطافت ناز کرتی ہے وجود سرور دیں پر
ہوئے ختنہ شدہ پیدا حبیب خالق اکبر

(مرقاۃ المفاتیح جلد 2 ص: 7)
۔۔۔۔۔۔۔۔۔۔۔۔۔۔۔

مسلمانو! ہمیشہ جشن آقا میں مگن رہنا
نبی کی ماں جناب آمنہ بی کا ہے یہ کہنا

پڑیں میری نگاہیں ایک افلاکی جماعت پر
وہ اترے تھے زمیں پر تین اجلے جھنڈے کو لے کر

کہ لہرایا انہوں نے خانہ کعبہ پہ اک جھنڈا
دگر جھنڈا جبین بیت مقدس کا بنا غازہ

(ہے عکاسی بہت دشوار اس پر کیف منظر کی)

وہیں ثالث علم گاڑا گیا چھت پر مرے گھر کی

(المواہب اللدنیہ/ الخصائص الکبریٰ)
۔۔۔۔۔۔۔۔۔۔۔۔۔۔۔۔۔

قریشی خانداں کے تین لوگوں کا یہ شیوہ تھا
کہ شب کو ایک بت کے کے پاس مجمع ان کا ہوتا تھا

وہ جیسے ہی وہاں پہنچے شبِ پیدائش آقا
تو ان تینوں نے دیکھا: بت پڑا تھا منہ کے بل اوندھا

یہ منظر دیکھ کر حیران و ششدر رہ گئے یکسر
پکڑ کر بت کو لوٹایا انہوں نے اس کی حالت پر

وہی لیکن اچانک انقلاب اس میں نظر آیا
انہوں نے تین بار ایسا ہی خود کو دم بخود پایا

تو بولے: واقعہ کوئی نرالا پیش آیا ہے
اثر جس کا مکمل طور سے اس بت پہ چھایا ہے

انہوں نے بت سے ہی حیران ہو کر واقعہ پوچھا
تو بت کے پیٹ سے نغمہ کسی ہاتف کا یہ گونجا

کے اس "مولود” کی تعظیم میں ہیں سر بسجدہ ہم
ہے جگ مگ جس کے دم سے سارے شرق و غرب کا عالم

(حجۃ اللہ علی العالمین ص:۔۔۔)
۔۔۔۔۔۔۔۔۔۔۔۔۔۔۔۔۔

شب پیدائش آقا کا بکھرا ہر طرف جلوہ
مسرت سے یکایک جھوم اٹھا خانہ کعبہ

یہ اس کا اضطراب شوق ایسا جوش پر آیا
مسلسل تین دن تک وجد وہ کرتا نظر آیا

ولادت باسعادت کا تھا روشن معجزہ پہلا
قریش مکہ کی آنکھوں کو جس نے کر دیا خیرا

(حجۃ اللہ علی العالمین ص:…)
۔۔۔۔۔۔۔۔۔۔۔۔۔۔۔

اثر گہرا پڑا اس واقعے کا دور تک کیسا
کہ کسریٰ کے محل میں زلزلہ برپا ہوا ایسا

یکایک جس سے وہ ایوان اک دم رہ گیا پھٹ کر
وہ تھا حالانکہ قائم ٹھوس بنیادوں پہ سرتاسر

بھیانک اک صدا کانوں میں ابھری اس کے پھٹنے کی
زمین پر گر پڑے پھر کنگورے چودہ کے چودہ بھی

دراں حالیکہ وہ تعمیر کا دلکش نمونہ تھے
وہ ہر بنیادی کمزوری سے فی الواقع معری تھے

حقیقت میں تھا ان باتوں سے منشائے الٰہی یہ
ہمیشہ کے لئے ہوجائے آقا کی نشانی یہ

جو دس صدیوں سے جلتی آ رہی تھی آگ فارس کی
ہمیشہ کے لئے وہ آگ فوراً ہوگئی ٹھنڈی

بحیرہ ساوہ، تھی مشہور جس کے آب کی وسعت
مسلط ہو گئی اس پر زمین خشک کی رنگت

(حجۃ اللہ علی العالمین ص:…)
۔۔۔۔۔۔۔۔۔۔۔۔۔۔

ہیں راقم حضرتِ بو الخیر شمس الدین بن جزری
"ثویبہ” نام کی خاتون، باندی بو لہب کی تھی

سنائی اپنے آقا بو لہب کو اس نے خوش خبری
مبارک ہو ولادت چاند سے پیارے بھتیجے کی

وہ سن کر یہ بشارت جھوم اٹھا شادمانی سے
کیا آزاد باندی کو اشارہ کر کے انگلی سے

تو بعد مرگ اس کو اس خوشی کا یہ ملا ثمرہ
کہ دوشمبہ کی ہر شب میں ہے اس کے ساتھ یہ قصہ

درآں حالانکہ وہ تھا کافر و مشرک حقیقت میں
مکمل سورہ قرآن ہے اس کی مذمت میں

سرے سے اپنی انگلی کے، اسے ہوتی ہے سیرابی
کہ اس شب اس پہ ہوتی ہے سزائے نار بھی ہلکی

تو پھر عشاق محبوب خدا کا حال کیا ہوگا
جو میلاد نبی پر کرتے ہیں اظہار خوشیوں کا

جو دل سے مرتکز رکھتے ہیں اس جانب خیال اپنا
لگاتے ہیں جو حسب استطاعت اس میں مال اپنا

قسم ہے جانب مولا سے اس کا یہ صلہ ہوگا
کہ اس کے فضل سے جنت میں اس کا داخلہ ہوگا

(جواہر البحار ج 3 ص: 360)
۔۔۔۔۔۔۔۔۔۔۔۔۔۔

منقح مسئلہ ہے "مجلس میلاد نبوی” کا
اسے حاصل ہے استحباب و استحسان کا درجہ

کتابیں درجنوں اس باب میں اسلاف نے لکھیں
کئی انداز سے شان "گل نایاب” میں لکھیں

امام احمد رضا نے نام کچھ ان کے گنائے ہیں
مکمل طور پر تحقیق کے جوہر دکھائے ہیں

(حیات اعلیٰ حضرت ج 1 ص: 157)
۔۔۔۔۔۔۔۔۔۔۔۔۔

منایا ہے صحابہ نے بھی میلاد شہ اکرم
وظیفہ ان کی ہستی کا ہوا یاد شہ اکرم

نبی کے تذکرے کے حلقے قائم جابجا ہوتے
بسا اوقات ان کے درمیان خود مصطفیٰ ہوتے

تعالی اللہ! آپ اپنا تعارف پیش فرماتے
خدا کے فضل کا چرچا بطرز خویش فرماتے
۔۔۔۔۔۔۔۔۔۔۔۔۔

روایت ہے یہ عبداللہ بن عباس سے مروی
کہ تھی آراستہ مجلس غلامان رسالت کی

وہ مل کر رہے تھے انتظار آقا کے آنے کا
جمال نور حق سے خانہ دل جگمگانے کا

تھا ان کے لب پہ ذکر انبیائے سابقیں جاری
کوئی بولا "صفا” کی شان آدم کو ملی ساری

کوئی بولا کہ ابراہیم کو حاصل ہوئی خلت
کسی نے سمت موسی کی کلیم اللہ کی نسبت

کسی نے حضرتِ عیسیٰ کو روح اللہ گردانا
کہ اتنے میں شہنشاہ رسالت کا ہوا آنا

ہوئے پیش صحابہ لب کشا محبوب رحمانی
کہ تم یہ جان لو: میں ہوں حبیبِ رب لاثانی

مگر میں فخر اپنی اس بزرگی پر نہیں کرتا
جزا کے دن "لواءالحمد” میرے ہاتھ میں ہوگا

کہ اس کے تحت، آدم اور دگر سب انبیاء ہوں گے
نہیں ہے درحقیقت فخر کو رشتہ ذرا مجھ سے

یوں ہی پہلے پہل زنجیر جنت میں ہلاؤں گا
مری خاطر ہی ہوگا سب سے پہلے باب جنت وا

نہیں ہے فخر اس پر بھی مجھے ذرہ برابر بھی
ہوں میں ہی اولین و آخریں میں سب سے برتر بھی

(جامع ترمذی ج 2 ص: 202)
۔۔۔۔۔۔۔۔۔۔۔۔۔۔۔

حقیقت یہ بھی ہے "تاریخ بن خلکان” سے ظاہر
ملا تھا شاہ اربل کو وہ ذوق طیب و طاہر

سجاتا تھا وہ "میلاد النبی” کا جشن سالانہ
بلاتا وقت کے علماء و شعراء کو وہ دیوانہ

بڑی تعداد میں علماء و شعراء جلوہ گر ہوتے
نبی کے تذکرے میں رات دن ان کے بسر ہوتے

مظفر شاہ اربل اور اس کے سب کے سب وزرا
بہاتے تھے نبی کے جشن پر انعام کا دریا

وہ آنے والے ہر مہمان کو عزت بھی دیتے تھے
جہاں نذرانہ دیتے تھے وہی خلعت بھی دیتے تھے

مجدد شیخ نبہانی نے بالتفصیل لکھا ہے
"جواہر” کے حوالے سے یہ منظر آشکارا ہے

(جواہر البحار ج 3 ص: 291 تا 293)
۔۔۔۔۔۔۔۔۔۔۔۔۔۔۔۔۔۔۔

کمالات محمد کا احاطہ ہو نہیں سکتا
عیاں قرطاس پر وہ نوری خاکہ ہو نہیں سکتا

کہاں میں بندہ ناداں کہاں سرکار کی مدحت
ادائے "سنت حسان” کی بس دل میں ہے حسرت

یہ حسرت یا خدا شرمندہ تعبیر ہو جائے
میرا ظلمت کدہ خامہ بھی پر تنویر ہو جائے

اسی پروانہ شمع رسالت کے وسیلے سے
امام اہل سنت اعلیٰ حضرت کے وسیلے سے

جنہوں نے زندگی یاد شہ دیں میں فنا کردی
جہان عشق میں ہر رخ سے تکمیل وفا کردی

انہی کی فکر نوری پر قلم ہو گامزن میرا
قبول عام کا اعزاز پاجائے سخن میرا

۔۔۔۔۔۔۔۔۔۔۔۔۔
تمت بالخیر
۔۔۔۔۔۔۔۔۔۔۔۔۔