نوجوان نسل کسی بھی معاشرے کا وہ ستون ہے جو اس کی ترقی اور استحکام کو مضبوطی فراہم کرتا ہے۔ لیکن اگر یہ ستون خود تباہی کی طرف مائل ہو جائے تو معاشرہ اپنی بنیاد کھو دیتا ہے۔ آج کا سب سے بڑا المیہ منشیات کا بڑھتا ہوا استعمال ہے، جو نوجوانوں کو اپنی لپیٹ میں لے کر ان کے خوابوں اور صلاحیتوں کو مٹانے پر تُلا ہوا ہے۔
منشیات کے استعمال کی وجوہات:
منشیات کے پھیلاؤ کے پیچھے کئی عوامل کارفرما ہیں۔ سماجی دباؤ، خاندانی مسائل، بے روزگاری، ناکامیاں اور ذہنی دباؤ نوجوانوں کو اس غلط راہ پر لے جاتے ہیں۔ سوشل میڈیا، فلموں اور دوستوں کا منفی اثر بھی منشیات کے استعمال کو بڑھاوا دیتا ہے۔
بدقسمتی سے، معاشرے میں منشیات کو اکثر تفریح اور فیشن کے طور پر پیش کیا جاتا ہے۔ نوجوان اپنے ذہنی سکون اور پریشانیوں سے فرار کی تلاش میں اس کا سہارا لیتے ہیں اور اس کا آغاز عموماً "تجربے” یا "دل بہلانے” کے بہانے سے ہوتا ہے، لیکن یہ معمولی تجربہ جلد ہی عادت اور پھر بیماری بن جاتا ہے۔جو جسم و جان کو اندر ہی اندر کھوکھلا کر دیتا ہے۔
منشیات کی اقسام:
چرس: بھنگ، گانجہ، اور حشیش اس کے مشہور ذرائع ہیں۔_ افیون: قدرتی منشیات جو سکون آور اثر رکھتی ہے۔ ہیروئن: افیون سے تیار کی جاتی ہے اور انتہائی مہلک ہے۔ کوکین: کوکا کے پودے سے حاصل کی جاتی ہے، اور انتہائی خطرناک نشہ ہےـ_ سگریٹ، پان، گٹکا: یہ عام طور پر استعمال ہونے والی لیکن نقصان دہ منشیات ہیں۔
منشیات کے اثرات:
منشیات کے اثرات صرف فرد تک محدود نہیں رہتے بلکہ پورے خاندان اور معاشرے کو اپنی لپیٹ میں لے لیتے ہیں۔ یہ جسمانی بیماریوں، ذہنی پریشانیوں اور اخلاقی گراوٹ کا سبب بنتی ہیں۔ منشیات کے عادی نوجوان اپنی صلاحیتوں کو کھو دیتے ہیں، ان کی تعلیم متاثر ہوتی ہے، اور اکثر وہ مجرمانہ سرگرمیوں میں ملوث ہو جاتے ہیں۔
منشیات کے خلاف اقدامات:
منشیات کے مسئلے کو حل کرنے کے لیے مربوط کوششوں کی ضرورت ہے۔ سب سے پہلے، والدین کو اپنے بچوں کے ساتھ مضبوط رشتہ قائم کرنا چاہیے اور ان کی سرگرمیوں پر نظر رکھنی چاہیے۔ جلسوں اور تعلیمی اداروں میں منشیات سے متعلق آگاہی مہمات چلانا چاہیے تاکہ نوجوان اس کے مضر اثرات سے واقف ہو سکیں۔
الحاصل: منشیات ایک خاموش قاتل ہیں جو نہ صرف فرد بلکہ پورے معاشرے کو نقصان پہنچاتی ہیں۔ ان کی روک تھام اور اس کے خلاف جنگ ہر فرد کا فرض ہے۔ نوجوانوں کو تعلیم، شعور اور مثبت سرگرمیوں کی طرف راغب کر کے اس مسئلے کا خاتمہ کر سکتے ہیں۔
ازقلم:
محمد توصیف رضا قادری علیمی
مؤسس اعلیٰ حضرت مشن کٹیہار
شائع کردہ: 21، نومبر، 2024ء
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
