از: طفیل احمد مصباحی
جلوہ افروز ہے وہ رشکِ قمر آج کی رات
” نور ہی نور ہے تا حدِ نظر آج کی رات "
وصلِ محبوب و محب کی ہے سہانی ساعت
شاد ہیں حور و ملک ، جن و بشر آج کی رات
کس گلِ قدس کی خوشبو ہے چمن زاروں میں
مہکا مہکا سا ہے کیوں راہ گزر آج کی رات
دیکھ کر سرعتِ رفتارِ براقِ آقا
محوِ حیرت ہیں صبا ، برق و شرر آج کی رات
اللہ اللہ رے سلطانِ دو عالم کا مقام
ان کے قدموں میں ہے جبریل کا سر آج کی رات
قدمِ نازِ پیمبر کا اثر کیا کہنا !!!
بن گئی رشکِ زمیں گردِ سفر آج کی رات
پیڑ آداب بجا لائے بصد عجز و نیاز
اور سلامی دے انہیں جھک کے حجر آج رات
اپنی تقدیر پہ نازاں ہوں اے امِ ہانی !!
رشکِ فردوس بنا آپ کا گھر آج کی رات
دیکھ کر سیر ِسماوات یقینا احمد !!!
جل اٹھے وہم و خیالات کے پر آج کی رات
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
آسان ہندی زبان میں اسلامی، اصلاحی، ادبی، فکری اور حالات حاضرہ پر بہترین مضامین سے مزین سہ ماہی میگزین نور حق گھر بیٹھے منگوا کر پڑھیں!
