نعت رسول

نعت رسول پاک علیہ افضل الصلوات و ازکیٰ التحیات

از: طفیل احمد مصباحی

جلوہ افروز ہے وہ رشکِ قمر آج کی رات
” نور ہی نور ہے تا حدِ نظر آج کی رات "

وصلِ محبوب و محب کی ہے سہانی ساعت
شاد ہیں حور و ملک ، جن و بشر آج کی رات

کس گلِ قدس کی خوشبو ہے چمن زاروں میں
مہکا مہکا سا ہے کیوں راہ گزر آج کی رات

دیکھ کر سرعتِ رفتارِ براقِ آقا
محوِ حیرت ہیں صبا ، برق و شرر آج کی رات

اللہ اللہ رے سلطانِ دو عالم کا مقام
ان کے قدموں میں ہے جبریل کا سر آج کی رات

قدمِ نازِ پیمبر کا اثر کیا کہنا !!!
بن گئی رشکِ زمیں گردِ سفر آج کی رات

پیڑ آداب بجا لائے بصد عجز و نیاز
اور سلامی دے انہیں جھک کے حجر آج رات

اپنی تقدیر پہ نازاں ہوں اے امِ ہانی !!
رشکِ فردوس بنا آپ کا گھر آج کی رات

دیکھ کر سیر ِسماوات یقینا احمد !!!
جل اٹھے وہم و خیالات کے پر آج کی رات

ہماری آواز

ہماری آواز ایک غیر جانب دار نیوز ویب سائٹ ہے جس پر آپ سچی خبروں کے ساتھ ساتھ مذہبی، ملی،قومی، سیاسی، سماجی، ادبی، فکری و اصلاحی مضامین اور شعر وشاعری پڑھ سکتے ہیں۔ یہی نہیں آپ خود بھی ہمیں اپنے پاس پڑوس کی خبریں اور مضامین وغیرہ بھیج سکتے ہیں۔

متعلقہ مضامین و خبریں

جواب دیں

Back to top button