نتیجہ فکر: سید اولاد رسول قدسی مصباحی
نیویارک امریکہ
سرکارِ دوجہاں سے محبت کریں نہ کیوں
تسکینِ قلب وجاں سے محبت کریں نہ کیوں
محسن نہیں وہ محسنِ اعظم ہیں بالیقیں
ہم ایسے مہرباں سے محبت کریں نہ کیوں
ضامن ہمارے بخت کی ہے ان کی رہ گذر
منزل کے ہم نشاں سے محبت کریں نہ کیوں
عرفان رب کا جس کی بدولت ملا ہمیں
اس وجہِ کن فکاں سے محبت کریں نہ کیوں
کلمہ تھا جس کا جملہ نبی کی زبان پر
اس فخرِ مرسلاں سے محبت کریں نہ کیوں
جس پر پڑے ہیں سرورِ کونین کے قدم
ہم ایسے آسماں سے محبت کریں نہ کیوں
احمد رضا جو حضرتِ احمد کی ہیں رضا
ہم حق کے اس نشاں سے محبت کریں نہ کیوں
جس کے سبب ہے گلشنِ کونین کی بہار
اُس اصلِ انس وجاں سے محبت کریں نہ کیوں
قدسیؔ رضائے ربِّ دوعالم کے واسطے
سیّاحِ لامکاں سے محبت کریں نہ کیوں
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
آسان ہندی زبان میں اسلامی، اصلاحی، ادبی، فکری اور حالات حاضرہ پر بہترین مضامین سے مزین سہ ماہی میگزین نور حق گھر بیٹھے منگوا کر پڑھیں!
