ہے مری افسردہ حالت اے سفیر لامکاں
بخش دیجے استراحت اے سفیر لامکاں
چاند سورج کہکشاں اور غنچہ و باغات بھی
پاتے ہیں تجھ سے ہی طلعت اے سفیر لامکاں
ڈال کر چشمانِ رحمت مجھ مریضِ قلب پر
کیجیے اچھی طبیعت اے سفیر لامکاں
تیرے صحرا کی کھنکتی ریت پر بھی ہے فدا
سارے عالم کی نزاکت اے سفیر لامکاں
تیرے شہر پاک کے ہر کوچہ و بازار میں
ہیں الگ رنگ و لطافت اے سفیر لامکاں
گفتگو پر رشک کرتی ہیں فصاحت کی بہار
تیری ہے ایسی بلاغت اے سفیر لامکاں
تیرے دربار معلیٰ کی حضوری کے لیے
کاش مل جاۓ اجازت اے سفیر لامکاں
لائق دیدار ہوں گی اس کی آنکھوں کی چمک
جس نے دیکھی تیری صورت اے سفیر لامکاں
کل صحابہ تابعین و اولیاء کے واسطے
دور کیجے میری کُلفت اے سفیر لامکاں
میں اسیر رنج و غم ہوں مفلس و نادار ہوں
کیجیے چشمِ عنایت اے سفیر لامکاں
کاش مل جاۓ ترے تن کا غسالہ بہر غسل
مہکے گی پھر میری میت اے سفیر لامکاں
آپ کا خورشید انؔور مانگتا ہے آپ سے
صبر و ہمت استقامت اے سفیر لامکاں
کیجیے خورشید انؔور صابری پر بھی کرم
کیونکہ ہے خطرے میں عزت اے سفیر لامکاں
فقیر صابری
محمد خورشید انؔور امجدی
8799305269
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
