نتیجۂ فکر: اشرف رضا قادری
چھتیس گڑھ
لختِ قلبِ مصطفیٰ خاتونِ جنت آپ ہیں
زوجۂ مشکل کشا خاتونِ جنت آپ ہیں
مصطفیٰ کی پیاری بیٹی ، والدہ حسنین کی
نورِ احمد کی ضیا خاتونِ جنت آپ ہیں
ربِّ اکبر کی عبادت میں گذاری زندگی
عابدہ و زاہدہ خاتونِ جنت آپ ہیں
ذکرِ حق میں آپ رہتی تھیں سدا رطب اللسان
ساجدہ و ذاکرہ خاتونِ جنت آپ ہیں
فاقہ سہہ کر بھی خدا کا شکر کرتی تھیں ادا
صابرہ و شاکرہ خاتونِ جنت آپ ہیں
آگہی کی بھیک لیتی ہیں جہاں کی عورتیں
عاقلہ و عارفہ خاتونِ جنت آپ ہیں
آپ کے گھر سے ہے پھیلی علم و حکمت کی ضیا
عالمہ و فاضلہ خاتونِ جنت آپ ہیں
بامروّت ، باحیا و جوہرِ حسنِ عمل
زیبِ بزمِ اتّقا خاتونِ جنت آپ ہیں
آپ کا آنچل نہ دیکھا مہر و مہ نے آج تک
پارسائی کی ردا خاتونِ جنت آپ ہیں
منقبت کرتا ہے اشرف ختم بس اس بات پر
عفت و عصمت فزا خاتونِ جنت آپ ہیں
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
آسان ہندی زبان میں اسلامی، اصلاحی، ادبی، فکری اور حالات حاضرہ پر بہترین مضامین سے مزین سہ ماہی میگزین نور حق گھر بیٹھے منگوا کر پڑھیں!
