ابھی اور ٹھہر اے مہ رمضاں

نتیجہ فکر: سلمان رضا فریدی مصباحی، مسقط عمان

تو ہم میں ابھی اور ٹھہر، اے مَـہِ رمضاں
اتنی بھی نہ جلدی سے گُزر اے مَـہِ رمضاں

حسرت سے تجھے چشمِ وفا دیکھ رہی ہے
خَم ہے ترے اعزاز میں سَر ، اے مہ رمضاں

ہم کر نہ سکے کچھ بھی تری شان کے لائق
روتا ہے جدائ سے جگر اے مہ رمضاں

شرمِندہ کھڑے ہیں تری دہلیز کے آگے
خاموش زباں ، دیدۂ تَر، اے مہ رمضاں

ہم جیسے نِکَمّوں پہ یہ احسان ہے تیرا
تو بن کے کریم آیا ہے گھر اے مہ رمضاں

افسوس کے آنسو ہیں مرے طَشتِ عمل میں
کردے مرے اشکوں کو گُہر اے مہ رمضاں

آئندہ ملوں تجھ سے یہ معلوم نہیں ہے
تو چھوڑ کے جامجھ پہ اثر اے مہ رمضاں

ہو تیری جھلک سیرت و کردار کے اندر
آنکھوں میں سما ! دل میں اُتَر، اے مہ رمضاں

مل جائے ترے در سے ہمیں "بَدْر” کا صدقہ
ہم زیر سے ہو جائیں زَبَر اے مہ رمضاں

تقوٰی مری فطرت میں سما جائے کچھ ایسا
ہر وقت ہو اللہ کا ڈر اے مہ رمضاں

لایـا ہـے تـو پـروانـۂ آزادئِ دوزخ
ہے مَخزَنِ بخشش ترا در اے مہِ رمضاں

محشرمیں نہ رکھنا ہمیں محرومِ شفاعت
اے چَرخِ مُرَوَّت کے قمر اے مہ رمضاں

گر تو نے عنایت کی نظر ڈال دی مجھ پر
مٹ جائے گا دوزخ کا خطر اے مہ رمضاں

بندوں کو دیا تو نے شب قدر کا تحفہ
بے شک ہے یہ اعزازِ بشر اے مہ رمضاں

ہے تیری جبیں ، جلوۂ قرآں سے منور
تو ہے شبِ عالم کی سحر اے مہ رمضاں

راتیں تری انمول ہیں دن تیرے نرالے
سب تجھ پہ فدا دولت و زر اے مہ رمضاں

مجھ کو تری آغوشِ کریمہ ہو میسر
جس وقت ہو دنیا سے سفر اے مہ رمضاں

کرتا رہے تقسیمِ ضیا، جس سے فریدیؔ
پیمانۂ فن نور سے بھر اے مہ رمضاں

تازہ ترین مضامین اور خبروں کے لیے ہمارا وہاٹس ایپ گروپ جوائن کریں!