علی گڑھ: 16جنوری// حضور حافظ ملت علامہ شاہ عبدالعزیز محدث مرادآباد علیہ الرحمہ(بانی الجامعۃ الاشرفیہ مبارک پور اعظم گڑھ، یوپی) اپنی گوناگوں خوبیوں اور علمی و اخلاقی عظمتوں کے اعتبار سے بالکل منفرد و یکتائے روزگار اور ایک جامع الصفات شخصیت کے مالک تھے۔ان خیالات کا اظہار مدرسہ اصلاح معاشرہ تعلیم آباد (وحید نگر) علی گڑھ میں منعقد عرس حافظ ملت کے موقع پر ضیاء الرحمن امجدی(استاذ مدرسہ ھذا) نے اپنے خطاب میں کہا۔مزید انہوں نے کہا کہ آپ نہ صرف ایک عالم دین، حافظ قرآن اور متقی و پرہیزگار بزرگ تھے بلکہ اپنی غیر معمولی فکری صلاحیتوں کی بنیاد پر اپنے ہم عصروں میں زبردست امتیازی شان بھی رکھتے تھے، شب و روز دینی کاوشوں کے باوجود جن مسائل کے مضمرات وعواقب کو اصحاب فکر ونظر حل کرنے میں ناکام ہوجاتے حضور حافظ ملت علیہ الرحمۃ ادنی غور و فکر اور معمولی توجہ سے ان کے تمام گوشوں کا تنقیدی جائزہ لے کر آسان فرما دیا کرتے۔ حضور حافظ ملت علیہ الرحمہ بھوجپور ضلع مرادآباد، یوپی میں دوشنبہ 1314ھ میں پیدا ہوئے، آپ نے اعلیٰ تعلیم دارالخیر اجمیر شریف میں خلیفہ اعلیحضرت حضور صدرالشریعہ بدرالطریقہ مولانا حکیم امجد علی اعظمی علیہ الرحمہ (مصنف بہار شریعت) سے حاصل کی اور خلافت و اجازت بھی حضور صدرالشریعہ بدرالطریقہ علیہ الرحمہ سے حاصل کی۔ حضور حافظ ملت کا تمام انسانوں کے لیےارشاد گرامی ہے۔ (1) انسان کو مصیبت سے گھبرانا نہیں چاہیے کامیاب وہ ہے جو مصیبتیں جھیل کر کامیابی حاصل کرے، مصیبتوں سے گھبرا کر مقصد کو چھوڑ دینا بزدلی ہے۔(2) اپنی قدر پہلے خود پہچانو دنیا میں باعزت بنوگے. (3) جس نے اپنا وقار خود خراب کرلیا دنیا کی نظر میں بھی ذلیل وخوار ہوا۔ (4) اتحاد زندگی ہے اور اختلاف موت ہے۔ (5) جسم کی قوت کے لیے ورزش ضروری ہے اور روح کی قوت کے لیے تہجد ضروری ہے۔ (6) تضیع اوقات سب سے بڑی محرومی ہے۔ (7) میرے نزدیک مخالفت کا جواب کام ہے۔ مزید انہوں نے کہا کہ حضور حافظ ملت علیہ الرحمہ کا وصال یکم جمادی الآخرہ 1396ھ میں ہوا،آپ کا مزار مبارک الجامعۃ الاشرفیہ مبارک پور اعظم گڑھ کے صحن میں ہے۔مولانا غلام مرسلین جامعی (استاذ مدرسہ ھذا ) نے کہا کہ آج تمام مسلمانوں کو حضور حافظ ملت علیہ الرحمۃ کے اس کو قول پر عمل کرنے کی ضرورت ہے” زمین کے اوپر کام زمین کے نیچے آرام”۔ نعت و منقبت کے گلدستے محمد انس ،محمد مونس نے پیش کیے۔ اس موقع پر محمد اسرار صاحب اورمدرسہ ھذا کے طلباء موجود تھے۔
زیر اہتمام:کل ہند انجمن اصلاح معاشرہ اہل سنت و جماعت علی گڑھAttachments area
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
