ازقلم: طفیل احمد مصباحی
پھیلی ہوئی ضیا ہے ، لَقَدْ جَاءَکُمْ رَسُوْل
مہکی ہوئی فضا ہے ، لَقَدْ جَاءَکُمْ رَسُوْل
ماحول خوشنما ہے ، لَقَدْ جَاءَکُمْ رَسُوْل
کونین مشک زا ہے ، لَقَدْ جَاءَکُمْ رَسُوْل
ہر سمت نور و نکہت و وجد و سرور کا
پُر کیف سلسلہ ہے ، لَقَدْ جَاءَکُمْ رَسُوْل
میلادِ مصطفیٰ کی سہانی گھڑی ہے یہ
ہر لب پہ مرحبا ہے ، لَقَدْ جَاءَکُمْ رَسُوْل
لرزہ ہے طاری قیصر و کسریٰ کے قصر میں
یہ کون آ گیا ہے ، لَقَدْ جَاءَکُمْ رَسُوْل
دنیائے کفر و شرک و ضلالت میں دیکھیے
ماتم عجب بپا ہے ، لَقَدْ جَاءَکُمْ رَسُوْل
” قَدْ مَنَّ ” سے عیاں یہ ہوا بعثتِ نبی
انعامِ کبریا ہے ، لَقَدْ جَاءَکُمْ رَسُوْل
گلزارِ ہست و بود میں کس آب و تاب سے
رحمت کا گُل کھِلا ہے ، لَقَدْ جَاءَکُمْ رَسُوْل
ظلم و جفا و جبر فنا ہو گئے سبھی
اب عدل کو بقا ہے ، لَقَدْ جَاءَکُمْ رَسُوْل
دیکھو لبِ نبی کو ” تشہُّدْ ” کے ما سوا
ہر گز نہ ” حرفِ لا ” ہے ، لَقَدْ جَاءَکُمْ رَسُوْل
اے منکرینِ عظمتِ سرکار ! دیکھ لو
قرآن کی صدا ہے ، لَقَدْ جَاءَکُمْ رَسُوْل
احمدؔ پڑھو درود ، کرو گھر میں روشنی
بابِ کرم کھُلا ہے ، لَقَدْ جَاءَکُمْ رَسُوْل
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
آسان ہندی زبان میں اسلامی، اصلاحی، ادبی، فکری اور حالات حاضرہ پر بہترین مضامین سے مزین سہ ماہی میگزین نور حق گھر بیٹھے منگوا کر پڑھیں!
