۱۱ رجب عرس سرکار ابوالحسین احمد نوری میاں مارھروی علیہ الرحمہ
نتیجۂ فکر: اشرف رضا قادری
چھتیس گڑھ
علم کے کوہِ گراں نوری میاں
دینِ حق کے پاسباں نوری میاں
گلشنِ ایقان کے تازہ گلاب
فکر و فن کے بوستاں نوری میاں
ان کی تصنیفات سے ہے یہ عیاں
حکمتوں کے دُر فشاں نوری میاں
بادۂ عشقِ نبی سے شاد کام
واقفِ سرِّ نہاں نوری میاں
تیری نکہت سے معطر ہے وجود
اے گلِ گلزارِ جاں نوری میاں
رب نے بخشا ہے تمہیں ایسا عروج
ہو گئے خلد آشیاں نوری میاں
ربِ اکبر کی عطا سے آپ ہیں
جود کی نہرِ رواں نوری میاں
آپ کی ہر اک ادا ہے بالیقیں
جاں فزا و جاں ستاں نوری میاں
نفس و شیطاں کے مکائد سے ہمیں
کر عطا حفظ و اماں نوری میاں
رنگ دو اشرف کو اپنے رنگ میں
اے ہمارے مِہرَباں نوری میاں
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
آسان ہندی زبان میں اسلامی، اصلاحی، ادبی، فکری اور حالات حاضرہ پر بہترین مضامین سے مزین سہ ماہی میگزین نور حق گھر بیٹھے منگوا کر پڑھیں!
