حضرت مفتی نظام الدین نوری نوراللہ مرقدہ کی یاد میں تڑپتے ہوئے دل کی آواز …
تو چل دیا تو آنکھ ہے گِریاں ترے لیے
مضطرہےدل اے نورئ ذیشاں ترے لیے
سرمایۂ ہنر کے امیں ، اے نظامِ دیں
غم گین ہے ادب کا دبستاں ترے لیے
ایسا الم ہے گلشنِ فیض الرسول کو
ہیں سارے گل تپیدہ و سوزاں ترے لیے
آدھے فلک پہ ڈوبا اچانک ترا ہلال
مُضطر ہے چرخ ، اے مہ تاباں ترے لیے
فیضِ نگاہِ نوری و اختر کے اے گہر
روشن ہوئے خزینۂ عرفاں ترے لیے
فکر رضا کے ناشر و بے باک ترجماں
دائم دفاعِ حق رہا عنواں ترے لیے
ضربِ کلیم تھی تری تقریر کی دھمک
صد آفریں ! اے غازئِ میداں ترے لیے
اخلاق اور علم کا سنگم تھی تیری ذات
کیوں کر بہیں نہ اشکِ فَراواں ترے لیے
اعلٰی تری خطابت و تدریس و شاعری
افسردہ ہیں تمام سُخن داں ترے لیے
اب بھی یقیں نہیں ہے تری موت کا ہمیں
کھولے ہوئے ہیں دید کے ایواں ! ترے لیے
جانے کدھر سے وصل کی تنویر مسکراے
ہرسو نظر ہے جلوۂ جاناں ! ترے لیے
اے جانے والے ! دیکھ پلٹ کر پھر ایک بار
ہر سمت ہیں چراغ ، درخشاں ترے لیے
اب بھی وہی ہجوم ، وہی دھوم ہے مگر
ہے ساری بزم ، اشک بَداماں ترے لیے
تربت پہ، التجاے فریدی کے گل ہیں پیش
باغِ جناں عطا کرے یزداں ترے لیے
ازقلم: سلمان رضا فرؔیدی صدیقی مصباحی
مسقط عمان
0096899633908
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
