ازقلم: طفیل احمد مصباحی
اخلاص کا خامہ ہو عطا دستِ ہنر میں
ہو عمر بسر وصفِ شہِ جن و بشر میں
توصیف و ثنائے شہِ ابرار کے باعث
شامل ہے تب و تاب مری فکر و نظر میں
پُر نور بنا دے مرے ہر خواب کا منظر
” اے جلوۂ محبوب نہ جا آ کے نظر میں "
اے منکرِ سرکار ! نظر کیوں نہیں آتا
اعجاز پیمبر کا تجھے شقِّ قمر میں
دیکھو کہ سمٹ آئی ہے ہر ایک فضیلت
اللہ کے محبوب شہِ جن و بشر میں
آقا نے جو پھونکا تھا کبھی صورِ عدالت
ہے آج بھی ایوانِ جفا زیر و زبر میں
جب کروٹیں لیتی ہیں تمنائے زیارت
اک ہُوک سی اٹھتی ہے مرے قلب و جگر میں
دنیا کو یہ انجام بتا دیجیے احمدؔ !
گستاخِ پیمبر کا ٹھکانہ ہے سقر میں
تازہ ترین مضامین اور خبروں کے لیے ہمارا وہاٹس ایپ گروپ جوائن کریں!
آسان ہندی زبان میں اسلامی، اصلاحی، ادبی، فکری اور حالات حاضرہ پر بہترین مضامین سے مزین سہ ماہی میگزین نور حق گھر بیٹھے منگوا کر پڑھیں!
